مراجعات أفلام ومسلسلات

الموسم الرابع من مسلسل “اللعبة”

– واخيرا وصلنا لنهاية الموسم الرابع من مسلسل “اللعبة” وهتكلم عنه النهاردة بس للأسف مش هيبقى عندي كلام كتير عليه لأنه ببساطة مش هيفرق عن كلام اللى قولته فى المواسم السابقة وبشكل عام البوست مش مراجعة قد ما هو كلام موجهه لصناع المسلسل سواء كتاب او منتج او ممثلين او مخرج

– بشكل عام الموسم الرابع أفضل واحسن بكتير من الموسم الثالث اللى فى رأيي أضعف موسم ما بينهم ولكن انا لسه عندي رأيي انه بعيد عن مستوى الموسم الأول ولو كان المسلسل كله زي اخر 6 حلقات كان وصل لمستوى الموسم الثاني وكان عداه

– انا مش بهاجم المسلسل فى فكرة الكسل او عدم الاجتهاد ، ولكن المسلسل خلينا متفقين انه شعبية كبيرة وانا من محبي سلسلة اللعبة ولكن فيه مقارنة واجبة ، لو جينا نبص على سلسلة “الكبير اوي” هنلاقي ان المسلسل عنده 7 مواسم ، واول 5 مواسم كلهم نزلوا ورا بعض تقريبا بس الفكرة رغم ان الكبير فى نفس الوقت عنده شعبية كبيرة بس الناس بقت متعودة عليه انه ينزل كل رمضان ويمكن الموضوع وصل ان مفيش اهتمام بمتابعة حتى لو المشاهد نفسه بيتفرج والموضوع وصل انهم وصلوا لاضعف موسم وبعديها غابوا كتير اوي ورجعوا للموسم السادس وحرفيا كسروا الدنيا ولما حاولوا يحلبوه فى السابع بقى اسوء موسم لدرجة اني تقريبا مكاملتوش

– طيب انا كلامي عن “اللعبة” بحبهم وبتابعهم حلقة بحلقة ويكفي انه كان مخليني اتابع بشوية اهتمام عن الموسم الثالث ، وكمان احسن حاجة ان فى اخر 6 حلقات خرجوا عن المألوف يعنى التحديات بقت أصعب وبقى فيه ترقب اكتر وبقى فيه شكل جديد فى ديكور وفى الأماكن غير الأشكال النمطية اللى احنا متعودين عليها ، ودة حسيته ان الممثلين نفسهم محتاجين دة لدرجة انهم نفسهم اجتهدوا وعايز اقولكم ان ضحكت كتير فى اخر 6 حلقات وأعتقد الحلقات ديه أتصور واتكتبت بعد شهر رمضان

– ودة اللى عايز اقولوا ان المسلسل فى الموسم الخامس ياخد وقتة قى الكتابة وفى الأفكار من المؤلفين لاني عارف قدراتهم كويس ودة باين من اول موسمين وبان فى اخر الموسم دة وياخدوا سنة هدنة ويرجعوا بموسم اقوى واقوى وكمان التصوير ياخد وقتة وبالتالي يبقى فيه مساحة ان يحصل تغيير وانهم ينقوا حاجات كتير مناسبة

– وفى النهاية الموسم الرابع اتبسط بيه وبالتحديد فى 15 حلقات التانيين وانا من محبيين السلسلة ولكن لازم يبقى فيه تقدير اكتر للجمهور اللى بيتفرج اللى انا عارف هيقبلوا ب أي حلقة تنزل وانا معنديش مشكلة فى دة بس يبقى فيه شوية اجتهاد زي اول موسمين

التقييم النهائي:(7/10)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى