صفحة الاعترافاتقصصمنوعات وأخبار تريند حالياً

بنت جميلة وقصتها العجيبة ما حدث معها سيناريو كالمسلسلات


اليوم بكمل ٣٠ سنة و حامل بالشهر الثامن بعد ما كل الأطباء حكولي مستحيل تخلفي

قصتي إني بنت عندي من الجمال الشيء الكثير والملفت لحد ما و الحمدلله الصحة جيدة والمصاري موجودة
و أعمل كطبيبة أطفال في مانشستر في انجلترا

درست الطب في الاردن و تخرجت أول دفعة
كنت شايفة حالي وما بحكي مع اي حدا ومش اي بني ادم بعبي عيني
و ظليت أتهبل على العلاقات الغرامية والمشاعر واحكي عنها هبل و دراما
لحد ما وقعت وما حدا سمّى علي
لما اجا طلبني في بيت أهلي وانا ما كنت متخيله يعملها وهو ما كان مصرح عن مشاعره تجاهي هون حسيت حالي واقعه في الغرام 😅
خطبنا وكان هو الأول والوحيد والأخير … الوحيد اللي حبني و سعالي بعد صراع هوشات ومشاكل و كره متبادل، الوحيد اللي حبني بغض النظر عن شكلي الخارجي أو عن وضعي المادي

بس سبحان الله، الله ما بعطيك كل اشي .. وكل بني آدم الا ما يكون بحياته شي ينكدها و ينغصها
بيوم من الأيام صديقتي مقيمة نسائية حكتلي تعالي أفحصك من باب المزح … انا بحياتي ما كان عندي مشاكل نسائية… المهم صفنت بتحكيلي انتي عارفه انه عندك رحم طفولي صح ؟! هون انا ارتعبت حكيتلها لا
بعدين ما خليت طبيب الا و زرته و كمان طلع عندي مشاكل بالمبايض و شكل البويضات ما كان سليم عدا عن التكيس الفضيع اللي عندي

أحلامي كلها انهارت بنهار
انا اصلا أحلامي كانت عبارة عن اني أتجوزه وأخلف منه .. ما كان عندي مشكلة أسكن بالكرك عند أهله ولا عندي مشكلة أترك شغلي وحياتي كلها
كان حلمي و هدفي طفلة و بيت و عيلة

لما عرفت عن وضعي واللي وصفه الي طبيب لبناني بأنه احتمالية حملي هي 0.1 قررت إني أترك خطيبي
مع اني كلي يقين انه ما رح يرفضني أو انه يتركني بسبب هاي المشكلة بس هو زيي و حلمه يكون عنده بنوته و يسميها ياسمين 💔

استجمعت قوتي و كتبتله مسج قصير وما كان عندي الجرأة أشوفه وجهاً لوجه و بعتله الخاتم و طلبت منه الطلاق
هو حاول يوصلي بس صديته و تم الطلاق مع رفض من عائلتي لكنني كنت مصرة

بعد الطلاق اصابني اكتئاب و تعبت نفسيتي جداً و تعداد خلايا الدم الحمراء كان لا يتجاوز ١.٨ مليون و كنت اخد وحدات دم و على الفاضي😅

بعد خمس شهور من انفصالنا بعتتلي أخته مسج و تحسبت علي جدا و دعت علي و حكتلي خطبته بكره و هو تخطاكِ عادي .. انا تعبت بزيادة مش لأنه خطب لا .. لانه أخته دعت علي و هي متوجعه عليه فاستنتجت انه هو تعذب بسببي

كنت أدخل المستشفى وأطلع وحالتي تسوء وما كان في تفسير طبي أو منطقي للي بصير معي بس أختي يلي كانت عارفه و تحكيلي صارحيه احكي معه
اكتشفت بعد فترة انه هو بعاني من نفس الأعراض وتعبان زيي
ما هان علي أبداً
نزلت على الأردن عشان أشوفه .. انهرت بس شفته بهديك الحالة
نسيت انه احنا منفصلين و هو نسي قعدت عنده بعد ما عملت طوشه مع أهله لأنه كارهيني ومعهم حق

البنت يلي خاطبها حكتلي اصلا كنت رح اتركه بس حزنت عليه اتركه وهو مريض .. ما بقدر أتحمل اتجوز واحد مش الي

لما صارحته بالسبب الرئيسي عصب علي و بهدلني بتذكرها بالحرف حكالي انا متجوزك لأني بدي اياكي بدي أكمل معاكي صح نفسي بخلفة بس نفسي فيكي اكتر ، أنت فيكي صيب 😅مش قادرة تستوعبي مشاعري تجاهك وأنا انبرى لساني قد ما سولفت بس عبث

أهالينا عارضوا رجوعنا و حكولنا مش لعب ولاد الجيزة و تشنططنا معاكو 😅

تجوزنا بتاريخ 25/10/2019 .. كانت الدنيا مش واسعتني من الفرحة
و بلشنا رحلة العلاج لعلّ وعسى ربنا يكرمنا بطفل يجبر خاطرنا فيه

عملت زراعة الرحم في ڤينا من أمي الله يرحمها و ما كانت اشي سهل ابداً
بعدها بلشنا بموضوع الحقن المجهري
جسمي تعب من الأدوية والهرمونات ونفسيتي بالحضيض لو هو ما كان جنبي ما كنت قادرة أكمل
عملت أول حقن و فشل
و الثاني والثالث
وبلش اليأس ياكلني
و هو ما كان يحسسني بس كان حيموت و يصير أب و تحديداً لبنوته

أما التاريخ اللي ما بنساه إطلاقاً هو يوم خميس الثاني من شباط ٢٠٢٣ اجاني اتصال من أخوه انه عمل حادث وهو بالمستشفى
وصلت المستشفى على أساس انه عايش بس عنده كسور
بالآخر ما خلوني أشوفه
نام بالثلاجة هديك الليلة .. وأنا ما عرفت أنام بعديها بالمرة

بعد وفاته بأسبوع بكتشف إني حامل
ما كان عندي أي ردة فعل … الحمدلله على كل شي
صدقاً وقتها كنت على وشك الكفر انه يا رب ليش هيك وليش أنا وليش وليش

عموماً لو ما كنت حامل كنت متت من قهري ومن الشوق .. ربما المسؤولية تجاه الطفل اللي جواتي خلتني أتمسك بالحياة

اليوم بدخل الشهر الثامن و حامل بثلاث أطفال ولدين و بنت
يا رب تجبر خاطري فيهم
يا رب ترحمه قد ما أنا مشتاقه اله و قد ما حبيته

بتمنى من كل حدا قرأ هاي الرسالة انه يترحم عليه و يدعيله والله كان حنون وطيب و حسن العشرة

حصرياً لموقع Mndora.com العديد من المواضيع تجدها على موقعنا الإلكتروني

زر الذهاب إلى الأعلى