مراجعات أفلام ومسلسلات

فيلم “بيت الروبي” هو أحدث افلام كريم عبد العزيز وبيشاركه كريم محمود عبد العزيز ونور وتارا عماد وبيحكي عن ابراهيم الروبي

– فيلم “بيت الروبي” هو أحدث افلام كريم عبد العزيز وبيشاركه كريم محمود عبد العزيز ونور وتارا عماد وبيحكي عن ابراهيم الروبي وعيلتة اللى بيقعدوا 7 سنين فى دهب وبعيد عن حياة القاهرة ولكن فى مرة بييجي إيهاب الروبي اخوه وبيطلب منه انه يرجع لسبب معين ولكن ابراهيم بالعافية بيوافق يروح معاه لسبب معين فى الماضي وبنشوف اية اللى هيحصل واية اللى حصل اصلا فى الماضي

– الفيلم من نوعية الافلام البلاك كوميدي ودة شئ عجبني جدا لان من اعلان الفيلم مكانش يبان على الفيلم دة اصلا ؛ وعجبني السيناريو جدا ل محمد الدباح وريم القماش انه قدر يعمل للفيلم بتاعنا شخصيات فعلا جيدة واحداث متماسكة ومترابطة وأننا مش مجرد داخلين فيلم كوميدي نضحك وخلاص ، لأ الفيلم من أوله وهو بيتوعد انه بيناقش قضية معاصرة عن السوشايل الميديا واستخدام التليفون او تصوير شئ مأسووي قد اية ممكن يقلب حياة انسان 180 درجة ، وكمان قدر يناقش الفكرة بواقعية لانه ابرزها فى مميزات وعيوب فعلا بتحصل واللى يضحكك اننا بنشوف دة بيحصل قدام عنينا وكل يوم كمان

– عجبني جدا أداء الممثلين من كريم عبد العزيز اللى لسه قادر إنه ينقلك من حالة ل حالة من خلال تحولات الشخصية ويقنعك بيها حتى لو مأخدتش وقت كافي على الشاشة واكتر حاجة عجبتني هي الكيمياء مع كريم محمود عبد العزيز اللى برضه بيقدم واحد من أفضل ادوراة ومن أنجح عناصر الكوميديا فى الفيلم ؛ تارا عماد شخصية مش مكتوبة حلو بس حاولت تأدي كويس ، نور عجبتني جدا وعجبني ان ليها دور اكبر من المتوقع و اعتقد دة برضه واحد من أفضل ادوراها واخيرا الأطفال معاذ ولوسينديا بالتحديد فاكهة الفيلم وضيوف الشرف منهم شريف الدسوقي ومحمد عبد الرحمن

– فى المجمل الفيلم عجبني وخلاني احس اني بتفرج على فيلم عادي وهادف وعنده رسايل جيدة عن الطبيعة والتكنولوجيا وتأثيرتهم ، يمكن بس العيوب كلها تتلخص فى حدوث كثير من الملائمات فى أحداث الفيلم وفيه مشهد قرب النهاية كنت حاسه اوفر شوية عن الجو العام للفيلم ولكن الله واعلم ممكن نلاقي المشهد دة بيحصل فى يوم من الايام

– وطبعا مقدرش انسى بيتر ميمي اللى فى كل مرة بيراهن رهان جيد وهو قدة على انه عايز يرجع السينما العائلية الحلوة وبينجح فى كل مرة وعجبني التصوير وصورة الفيلم بشكل عام حلوة جدا واخيرا الموسيقى التصويرية ل خالد حماد اللى قريبة من مسلسل صاحب السعادة لعادل أمام وكانت من العناصر اللى بسطتني جدا

التقييم النهائي: (8.5/10)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى