مراجعات أفلام ومسلسلات

فيلم “Asteroid City” هو أحدث افلام المخرج ويس اندرسون واللى متاح

– فيلم “Asteroid City” هو أحدث افلام المخرج ويس اندرسون واللى متاح دلوقتي على كل المواقع ، والفيلم بيحكي عن كاتب بيقرر انه بعمل مسرحية مكونة من 3 فصول وبنشوف هو بيعملها ازاي وبنتابع قصة المسرحية اللى بتحكي عن اب له ولد و ٣ بنات عربيتهم بتتعطل فى المدينة والمدينة ديه فيها مجموعة من الشخصيات والناس ديه بتحصلها حدث غريب بيغير كل شئ وبنشوف اية اللى هيحصل

– الفيلم هو نفس طبيعة ويس اندرسون واللى بقت تريند مؤخرا على TikTok وهو افلامة مش مناسب لأغلب الناس ولكن انا شايف ان هو مخرج استثنائي فى طريقة حكي او سرد القصة بطريقة مختلفة شكلا وموضوعا ومحدش قدر ينجح ويعملها بكفأة غيره والمرة دي هو بيقدلمنا سرد القصة فى شكل مسرحية

– وانت بتتفرج هتحس ببصماتة ، المسرحية حرفيا مكلفة سواء فى شكل الديكورات الكرتونية المبهرة جدا فى جودة إنتاجها وتصميمها بعناية وكمان طريقة التصوير والكدرات واللوحات الفنية والرائعة جدا ، اهتمام بتفاصيل الحقبة وألوان الصورة اللى شكلها جامد والملابس الشخصيات بالإضافة لوجود المؤثرات البصرية القليلة الجيدة وزي ما قولت تنويع الألوان والاضاءة يستحق التحية جدا عليها

– كمان اندرسون بيجمع اكبر عدد من الممثلين صاحبة الاسامي الكبيرة واللى احنا عارفين ان كلهم مش بياخدوا أدوار كبيرة باستثناء اتنين او تلاتة منهم ولكن من ناحية السيناريو وزي ما أتقدم فى النصف الاول من الفيلم الحبكة الرئيسية والشخصيات وعلاقات الشخصيات ببعض ووجود كذا خط درامي حقيقي كلهم معمولين بأتقان وبيقدملك المفيد منه بس واللى هيقدر انه يعكس الحاجات ديه فى الأحداث أتقدم بشكل رائع وكنت مبسوط منه اوي

– وفى النصف الثاني مع انطلاق الحبكة الامور بتوضح وبنعرف الغرض من القصة وانه بيناقش وبينتقد السلطة الأمريكية و بيورينا دور العلماء ودور عامة الشعب ومواقفة أثناء مواجهة خطر بيقتحم المدينة وهتحسوها انها حصلت معانا قريب وكأن ويس اندرسون بيسخن او بيرمي على ثورة او معارضة ومن الناحية التانية بيورينا دور الفن انه بيبرز دة ازاي وعواقبه اية والجميل هنا طريقة الطرح لانكم فعلا هتلاقوا نفسكم فى حدوتة درامية ودة سر النجاح انك ازاي تخليني اتفرج على حاجات علمية وسياسية من غير ما اطلع اقول انه فيلم من النوعية ديه والجميل انه قدم كل حاجة من دراما وسياسية وعلم وكوميديا وأغنية ورقص ومسرحية وكارتون

– حقيقي رائع وقدرت طريقة السرد جدا ، وطبعا أداء الممثلين كلهم كانوا رائعين جيسون سكورتزمان كان مبهر ورائع وثنائيتة مع سكارليت جوهانسون كانت اكتر من رائعة وهما أبرز شخصيتين فى الفيلم كمان الولد والبنت الكبار دول كانوا من أروع الجوانب فى الفيلم دة ، توم هانكس و ستيف كاريل وبريان كرينستون ظهورهم اقل من حقهم بس كاريزمتهم طاغية وادوارهم محسوسة وادوها بشكل رائع

– لكن مشكلتي مع الفيلم حاجتين ، الأولى هي ان فيه بعض شخصيات النادرة جدا ومنهم أدوار لممثلين ووممثلات ليهم اسمهم بس لو شيلناهم مالهمش تأثير فى الأحداث او على الاقل اقدر اقول ان كان أولى ممثلين تانيين يلعبوا ادوارهم ، والحاجة التانية ان فيه تحذير على وجود مشهد واحد فقط شذوذ ضيقني جدا وديه مكانتش فى طبيعية ويس اندرسون

– لكن بشكل عام الفيلم عجبني جدا وانبسط بمشاهدتة وبشكل عام الفيلم مناسب لكل الأعمار باستثناء لقطتين فقط عدوهم وهتتبسطوا اوي وهو واحد من أفضل أفلام 2023

التقييم النهائي: (8.5/10)

زر الذهاب إلى الأعلى