مراجعات أفلام ومسلسلات

فيلم “Spider-Man Across The Spider-Verse

– فيلم “Spider-Man Across The Spider-Verse” هو الجزء الثاني من السلسلة بعد طرح الجزء الأول فى 2018 وكان فيلم جيد جدا ولكن احنا هنا فى الجزء دة احنا بنتبع رحلة مايلز ورحلة جوين ستاسيسي وعلاقتهم بعائلتهم وازاي الماضي بيأثر عليهم وبنتبع كمان فكرة المالتيفيرس وهو بيحصل وزي ما كان واضح من البوستر والتريلر

– الفيلم للأسف هيتعرض عندنا فى مصر يوم 21 يونيو فى السينمات وانا الصراحة ماستنتش من كتر الكلام اللى سمعت عنه بالإضافة ان فيه كلام انه ممكن مايتعرضش فى الوطن العربي وقولت لنفسي اشوفة وعلى اية وجع الدماغ دة 😂

– المهم النصف الاول من الفيلم نقدر نقول انه كان جيد جدا قدر يقدملنا مايلز وجوين من جديد وبيحكي ازاي الماضي دة بيأثر عليهم وعلى علاقتهم بعائلتهم وهل هيقدروا يكشفوا عن هوايتهم بالفعل ولا دة مش هيحصل ودة فى وجود شرير الفيلم سبايدر بانك اللى بالنسبالي من احلى شخصيات الفيلم وكان عنده توازن رائع ما بين الجدية المؤذية وما بين الكوميديا نظرا للسمات الشخصية نفسها وحسيته اللى هو مجرد امتداد للجزء الاول وكمان محاولة اكتمال علاقة رومانسية ما بين مايلز وجوين

– بس فى النصف التاني هنكتشف ان النصف الاول كان مهم جدا لانه بيستخدم تمهيد اكبر للمالتيفيرس وكمان اية فكرة انه يبقى فيه كذا سبايدر مان من كل العوالم ومفاجأت الفيلم هنا مش بتخلص وفيه حاجات تانية كتير لغاية لما بيوصل للنهاية والحدوتة مش بتخلص وديه كانت صدمة بالنسبالي

– ف عيب الفيلم انه ممهدليش ان احنا مقبلين على حدوتة مخلصتش وأعتقد دة من حق أي حد يعرفه ، لكن كمية المعرفة والانجازات البصرية اللى اتقدمت بفيلم انيميشن ماشوفنهاش قبل كدة ولا يقل عن اللى أتقدم فى Everything Everywhere All At Once كفيلم لايف اكشن والانجازات اللى فى السيناريو ومفاجأتها والتوائتها كانت اكتر من رائعة وحرفيا كنت مبسوط جدا بالنصف التاني كله، كمان الفيلم خلق قصة فيها كتير من الرسائل عن علاقتة الجيل الحالي بأهلهم ودة أتقدم بصورة جيدة جدا ، الكوميديا كانت حلوة جدا فى النصف الاول

– وبشكل عام انا اتبسط بالفيلم واستمتعت بكل حاجة فيه وبقيت مستني الجزء الثالث على نار جدا ولو الفيلم ماتمنعش وبقى عندي وقت اشوفة تاني اكيد هروح اعمل كدة

التقييم النهائي:(8.5/10)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى