ترشيحات أفلام ومسلسلات للمشاهدةمراجعات أفلام ومسلسلات

مسلسل “Silo”

مراجعة مسلسل “Silo” … (لا يوجد حرق لأحداث المسلسل)

قصة المسلسل بكل بساطة بتحصل أحداثها بعد انتهاء الحياة على الأرض والبشر المتبقين عايشين داخل صومعة عملاقة تمتد لمسافة كبيرة جدا تحت سطح الأرض، ولكن محدش عارف من امتى والبشر عايشين داخل الصومعة أو ايه السبب إلى خلالهم يعيشوا فيها أو حتى مين هو مؤسس الصومعة، بالإضافة إلى ذلك الصومعة بيحكمها قوانين غريبة وصارمة

ولكن كل ده بيبدأ يتغير لما شخص ما بيكتشف سرا ما وبيبدأ يبحث عن الحقيقة … وبس كده وبنشوف هيحصل ايه

مبدئيا كده ده أكيد واحد من أفضل مسلسلات ٢٠٢٣ حتى الآن وإلى واضح بعد لما اتفرجت على الحلقة الأخيرة منه أنه هيكون موجود معانا بقوة خلال السنوات القادمة بمواسم جديدة، ولو انت بتدور على عمل يكون ممتع وفكرته حلوة ومتنفذ بشكل كويس جدا وصالح للمشاهدة العائلية يبقى ده هيكون اختيار مناسب ليك

وحقيقى المسلسل بشكل عام ممتع فعلا وإيقاعه ومستوى الاثارة فى أول ٣ حلقات واخر ٤ حلقات كان تصاعدى، ولكن فى ٣ حلقات فى النص بسبب البداية القوية إلى كان فيها شخصيات كتير المسلسل كان محتاج ياخد نفسه ويهدى عشان يعرفنا اكتر على الشخصيات وتفاصيل الحياة فى الصومعة

على مستوى الغموض المسلسل قدر أن يجذب انتباهى ويخلينى مستنى المفاجأت لكن الحقيقة أنه كان بخيل شوية فى حتة المفاجأت ومش عايز يظهر كتير منها، وده بيخلى مستوى التوقعات أعلى عند المشاهد لما المفاجأة تحصل ،بس برضه هو كان على مستوى التوقعات فى مشهد النهاية إلى بيمهد لموسم تانى اقوى

على مستوى الشخصيات بقى فالشخصيات معانا كلها كويسة لكن مفيش شخصية اقدر اقول عليها أنى عمرى ما شوفت زيها أو كانت مميزة لدرجة لافته، بس مش هتضايق من حد فيهم، وأداء ابطال العمل كان جيد لحد كبير

إجمالا بقى مسلسل”Silo” مسلسل ممتع جدا ويستحق المشاهدة ومناسب للسهرات، ومتاح دلوقتى الموسم الاول كامل منه على ابل بلس مكون من ١٠ حلقات ومتوسط مدة الحلقة حوالى ٤٥ دقيقة

وإلى اتفرج على المسلسل يشاركنا رأيه في الكومنتات✌🏻

وتقييمى للموسم الأول …. (8 / 10)


#SiloAppleTV

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى