ترشيحات أفلام ومسلسلات للمشاهدةمراجعات أفلام ومسلسلات

مشاهدة الموسم الثانى من المسلسل الرائع “The Bear”

لسة مخلص مشاهدة الموسم الثانى من المسلسل الرائع “The Bear” … وحقيقى مش قادر اعبر عن مدى انبهارى بهذا الموسم الثانى الى أقدر اصنفه بالنسبالى كواحد من أفضل مواسم الأعمال التليفزيونية إلى شوفتها فى حياتى

ولو انت شوفت الموسم الأول إلى كان رائع ومميز وعجبك، فالموسم ده هيخدك معاه للمستوى الأعلى على كده الأصعدة وفى على الأقل ٣ أو ٤ حلقات فيه ياخدوا العلامة الكاملة مستريح

وكل الأصعدة هنا أقصده بيها كل التفاصيل والشخصيات والعلاقات الدرامية والجوانب الفنية المتعلقة بالصورة والصوت المرتبطه بطبيعة المكان إلى أحداثنا بتدور فيه، إلى جانب طبعا الموسيقى التصويرية واختيارات الاغانى المميزة جدا إلى أضافوا كتير للمشاهد، وقوة المشاهد الحوارية بين الشخصيات وكل إلى قولته ده متقدم بشكل متكامل ومتجانس مع بعضه هيخليك متفاعل معاه طوال ال ١٠ حلقات وحاسس بحالة التوتر والصخب والضغوطات إلى ابطالنا بيعيشوها

ولما نتكلم عن ابطال العمل فالموسم ده بيبرز كل شخصية معانا بشكل أكبر وبيديها مساحتها وحقيقى هتتفاعل مع كل الشخصيات، بالإضافة إلى ظهور ممثلين تقال ومعروفين جدا كضيوف شرف معانا، وحقيقى لو حد عايز يتعلم ازاى يطلع ممثل فى عمل كضيف شرف ويكون ليه تآثير بارز فى الأحداث اتفرج على الموسم ده

إجمالا أنا سعيد ومبسوط ومبهور بهذا الموسم وبرغم انى حبيت الموسم الاول لكن ده أعلى بكتير من الاول، وبرغم برضه انى كنت ناوى انزل النهاردة مراجعة مسلسل “Silo” لكن مقدرتش استنى عشان اعبر عن مدى انبهارى بهذا العمل

وطبعا إلى اتفرج على المسلسل يشاركنا رأيه في الكومنتات ✌🏻

وتقييمى للموسم الثانى … (10 / 10)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى